عشق المصرى والمصرية للكراكيب وتخزينها هو عشق أفلاطونى بل غرام جنونى، أختار ممن كتبوا عنها ببراعة وخفة دم، الكاتبة الكبيرة سناء البيسى، وأستاذ طب وجراحة العيون د. محسن سالم، فلنقرأ ما كتبته سناء البيسى عن الكراكيب:«التراث حاجة والكراكيب القديمة حاجة تانية خالص‏.. وتراث بيتنا كان زمان فى يد مبروكة أمينة؛ متحف الصندرة التى تصعد إليها فوق السلم الخشبى المدعم برباط ضاغط فى أكثر من درجة مخلخلة، كى لا تقع مكسورة الترقوة لتدس فى مساحاتها الشاغرة على التوالى أشياء معوقة‏.. مثل مقعد بيانو برجل طايرة‏.. وعربة مولود شب عن الطوق وأصبح طول بعرض على وش جواز.. وسجادة متهالكة قد تصلح لتخريج شلت للأرضية‏.. ‏ورخامة اللوفومانو المشروخة المرسومة شىء إلهى كأنها جلد حمار وحشى‏.. وبراويز عرايس وعرسان اتجوزوا، وخلفوا، وماتوا‏، ‏ ودفعات تخرج أحيلت للمعاش.. وعيال مدارس قاعدة بمرايلها على قرافيصها قدام حضرات النظار.. وبرطمانات بدون غطاء‏.. وأباجورات تستحق إعدامها‏.. وكتب مدرسية شفرت مناهجها.. وشهادات كحكها أحمر، وحقائب كالحة‏، وألواح زجاج مشروخة فى المنتصف وطرفها سكين.. وشموع فرح سايحة ومعوجة‏.. وغربال سبوع، وبانيو مقشر، وبلتكانة سرير، ولوحة سيلويت لرب البيت بدون مناخير.. ورشاشة زرع لبلكونة قفلوها بقفص للنوم.. وفروة خروف».وهذا ما كتبه بلغة عامية جميلة كوميدية لاذعة د. محسن سالم:المصرى الأصيل..عاشق التخزين..تحت السرير..فوق الدولاب..تحت الحوض..عالسطوح..وفى البلكونة..ممكن، ومش حاعترض، لكن العجيب هو ما يقوم بتخزينه!حاجات بجد عجيبة جداً..من أول علب الحلاوة وزجاجات البيبسى.. مروراً ببرطمانات المربى وكراريس العيال.. وجرايد ومجلات حواء والكواكب.. وفردة جزمة شمال! ولمبة محروقة.. وإيد أتارى..وفيوزات صينى لادعة.. وسماعة تليفون من غير عدة، بسلك ملولو! وكرسى بثلاث أرجل.. وكنبة بهيكل سوستى! وحتى شرايط الكاسيت والأقلام الفاضية والبطاريات (عادى أو عربية).. إلى فرد الكاوتش القديم ومقص عربية والكبالين (فى الـ١٢٨)...! منظومة كاملة متكاملة لرعاية الفئران والعِرَس! قناعتى أن هذه العادة المصرية متوارثة ومن قديم الأزل.. لدرجة أنى بدأت أعتقد أن الهرم الأكبر مش مقبرة.. أبسولوتلى! أكاد أجزم أنه كان.. مخزن لخوفو! علشان يحط فيه جعارينه هو وإخواته.. وطوق أنوبيس المقطوع.. ومسلات تالتة تالت.. عشان بتاح (أخوه الصغير) لما يكبر يذاكر فيهم! وكراكيب وحجارة المعبد القديمة بتاعة الأسرة التالتة بحالها! لفف ورق بردى بايظة.. وأدوات تحنيط منتهية الصلاحية من الأسرتين اللى قبله! وقزايز الزيبق الأحمر الخلصانة.. وفردة مكسورة من عجلة رمسيس الحربية! على رجل كبش، وتابوت من غير قعر!وكله مسيره ينفع! ولما الجماعة بتوع الأسرة الخامسة اشتكوا من أنهم زاحمين مدخل المعبد، فقام خوفو لم الكراكيب وعمل لهم الهرم الأكبر! المدهش أن خفرع مالقاش مكان، فحط كراكيبه فى هرم منفصل! من كام سنة واحد من أصدقائى، والدته رحمها الله عملت عملية تغيير مفصل.. بعد خروجها بالسلامة، طلب من الجراح مفصل الفخذ القديم عشان يحطه بكارتونته فى البلكونة! مين عارف.. يمكن يعوزه!طرائف الكراكيب لا تنتهى.. فهل أنت قارئى العزيز من هواة الكراكيب؟